Rugadh Brian i mBaile Átha Cliath. D’fhreastail sé ar an gColáiste Náisiúnta Ealaíne is Deartha Baile Átha Cliath agus scoil ealaíne St. Martins, Londain. Bhí sé ina ionadaí d’Éirinn ag an Páras Biennale in 1965, bhuaigh sé an chéad duais sa chomórtas Irish Exhibition of Living Art in 1967, agus bronnadh gradam O’Malley air ón Institiúid Chultúrtha Gael-Mheiriceánach. Tá cáil bainte amach ag Bourke mar gheall ar na portráidí sainiúla agus féinphortráidí a chruthaíonn sé. Tá dathanna láidre agus scigléiriú mar thréithe láidre ina chuid oibre.

Tá Aoife ag obair agus ag cur fúithi ar an gCeathrú Rua, Conamara mar físealaíontóir, scríbhneoir ficsin agus ag obair ar saothair nuálacha. Díríonn a cuid oibre ar ceisteanna an tsaoil; iontaoibh, fírinne, guth, easpa gutha, na mothúcháin a ghabhann leo agus an chaoi a dtéann siad i bhfeidhm orainn agus sinn lonnaithe in áit áirithe. Tá suim faoi leith aici i gcarachtair, in idirnaisc aisteacha, an t-aisteachas agus an leochaileacht a bhaineann lenar saol inmheánach, chomh maith le forbairt agus meath caidreamh. Tá sí ag baint taitneamh as an bpróiseas agus an gníomhú dátheangach lenar dtimpeallacht agus lenar n-oidhreacht chultúrtha.

Is as Corcaigh í Clare Cashman ó dhúchas. Rinne sí staidéar ar an mínealaín péintéireachta i gColáiste Náisiúnta Ealaíne is Deartha, Baile Átha Cliath. Is iomaí gradam atá buaite aici ó bhain sí an chéim amach in 2002, an CAP Foundation Art Award agus an Tony O’Malley Travel Award for Painters ina measc, mar aon le sparánachtaí ón gComhairle Ealaíon agus Ealaín na Gaeltachta. Tá samplaí dá cuid oibre le feiceáil sna taispeántais seo a leanas: 'Folkatronica' ag an Sugar Club, Baile Átha Cliath, 'Thirty-Two Thousand Years Later’ ag Pallas Projects, Baile Átha Cliath agus ‘C2’ at the Crawford Municipal Art Gallery, Corcaigh. Faoi láthair, tá Cashman ina cónaí i gCasla, Conamara, Co. na Gaillimhe.

Déanann saothar Lelia ionadaíocht ar a háit chónaithe, ceantar Chois Fharraige i ndeisceart Chonamara. Tá a cuid ealaíne fréamhaithe sa dúchas, ag díriú go príomha ar an gceantar, an baile agus na héiceachórais, mar aon leis na dúshláin a bhaineann leis an slí ina mbreathnaímid ar ábhair. Tugann Leila faoina hoibre san am i láthair ag baint úsaide as ábhar áitiúil. Is breá léi an spontáineacht agus na deiseanna a chuireann na hábhair seo ar fáil di.

Rugadh Áine i gcathair Chorcaí, ach is de bhunadh Chorca Dhuibhne a sinsear. Tá sí ag obair agus ag cur fúithi mar ealaíontóir sa Daingean ó 2007. Tá céim onóracha aici ó Choláiste Ealaíne agus Deartha Crawford, Corcaigh. Tá a saothar ealaíne á léiriú i mbailiúcháin phríobháideacha agus phoiblí, ina measc; HETAC, Institiúid Teicneolaíochta Chorcaí, agus Comhairle Contae Chiarraí. Is iomaí sparánacht agus gradam atá buaite aici ó Ealaín na Gaeltachta, Comhairle Contae Chiarraí agus Ionad Scannáin Chorcaí.

Rugadh agus tógadh Róisín i nGaeltacht na Rinne, Co. Phort Láirge. Bhain sí cáilíocht amach mar dhearthóir gloine ó Choláiste Náisiúnta Ealaíne agus Deartha, Baile Átha Cliath i 1988. Le linn an ama sinn, d'fhorbair sí modhanna nua frithchaitheamh solais sa chónasc idir gloine agus uisce sa dealbhóireacht. Tá tréimshí caite aici ag obair sa Danmhairg agus sa Ghearmáin, chomh maith le taisteal forleathan san Áis agus san India ag déanamh staidéir ar na healaíona dúchasacha. Tá tionchar na dturas seo le sonrú ina cuid saothair. I láthair na huaire tá Róisín ag obair ina stúideó i mBaile 'n Sceilg agus is é an tírdreach mórthimpeall uirthi, mar aon le cúrsaí mara is mó a théann i bhfeidhm uirthi ina cuid oibre. Cruthaíonn sí éifeachtaí comhdhéanta agus doimhneacha ag baint úsáid as teicníci ar nós srathú, eitseáil aigéadach agus adhdhlúthú. Tá pátrún iontaisithe le feiceáil ina cuid oibre mar thoradh ar na teicnící sin.

Rugadh Helen i gcontae Chorcaí agus tá formhór dá saoil caite aici i nGaeltacht Mhúscraí. Is ealaíontóir ceirmeach í don chuid is mó, ach tugann sí na meáin mheasctha isteach ina cuid oibre chomh maith. Is é an domhan nádúrtha is mó a thugann spreagadh di.

Tá an t-ealaíontóir Seán Cathal ina phéintéir meitifisiciúil i bhfad níos mó ná péintéir insinte, sa chaoi is go láimhseálann sé na chéad phrionsabail de rudaí, ina measc an coincheap, nó na coincheapa teibí de bheith beo, feasacht, am, spás, agus – go ríthabhachtach dó-san – féiniúlacht. Cé go bhfuil a chuid tagairtí pictiúrtha an-phearsanta, tá siad Eorpach chomh maith sa bhrí is go bhfuil sé in ann creatlaí samhlaíocha a chur le chéile laistigh de phrionsabail Arastaileacha de bheith agus den fheasacht.

https://www.meoneile.ie/cultur-agus-ealain/taispeantas-speisialta-le-sean-cathal-o-coileain-le-feiceail-sa-ghailearai-in-aislann-ghaoth-dobhair

Is amhránaí agus amharc-ealaíontóir Éireannach comhaimseartha í Ceara Conway. Cruthaíonn sí saothair eispéireasacha nuálacha ag baint úsáide as amhrán, ceoil, agus amharc-ealaíon traidisiúnta agus comhaimseartha. Díríonn a cuid oibre ar ceisteanna sóisialta, cur i gcás an ghéarchéim éiceolaíochta, imirce agus ábhar feimineachais. Seo a leanas tionscadail dá cuid atá le teacht: The Feminist Supermarket, Teach Ormston, Ionad Acmhainní Cultúrtha, Luimneach (2021), Illuminations Gallery, Ollscoil Mhá Nuad (2021), Pocahontas Opera House Residency, West Virginia, Stáit Aontaithe Mheiriceá (2022).

Tuilleadh eolais ag: www.cearaconway.ie

Rugadh Bernadette Ní Choitir i mBéal Átha’n Ghaorthaidh, Co. Chorcaí sa bhliain 1958, áit a bhfuil cónaí uirthi faoi láthair. Tá BA aici ón gColáiste Náisiúnta Ealaíne, Baile Átha Cliath, agus bronnadh scoláireacht Fulbright uirthi i 1986. Chaith sí 11 bliain i Meiriceá agus bhain sí ard chéim amach ón San Francisco Art Institute i 1989. Tá taispeántais aici in Éirinn, san Eoraip, sna Stáit Aontaithe, sa tSín, agus sa Chóiré. D’oibrigh sí i gcomhar leis an bhfile Nuala Ní Dhomhnaill ar a saothar ‘Dinnseanchas’, chomh maith leis na healaíontóirí iomráiteacha Iarla Ó Lionáird agus Feargus Ó Chonnchúir ar a saothar ‘Idir’.

Rugadh Tomás in An Ghráig, Baile’n Fheirtéaraigh, Co. Chiarraí. Bhí suim aige sna healaíona ó bhí sé óg, agus rinne sé cúrsa oíche san eitseáil agus sa ghreanadóireacht. Is iomaí gradam atá buaite aige agus tá clú agus cáil bainte amach aige mar cheann de na déantóirí priontaí is fearr in Éirinn. Ghlac sé páirt i dtaispeántais ghrúpa san Acadamh Ibeirneach Ríoga, Gailearaí Crawford agus Taispeántas Náisiúnta an Oireachtais. Tá formhór a shaoil ghairimiúil caite aige ag teagasc deartha troscáin, adhmaid agus ceird an mhiotail. Tá taispeántas dá shaothar le feiceáil i ngailearaí Crawford, Corcaigh i láthair na huaire.

Is físealaíontóir, léiritheoir agus oide é Andrew. Is as Baile Átha Cliath ó dhúchas é agus tá sé ag cur faoi ar leithinis an Daingean in iarthar Chiarraí ó 2000. Is é imeallachas na háite is mó a théann i bhfeidhm air. Baineann sé leas an as timpeallacht mar áit frithsheasmhach le diminicí nua a chruthú idir an duine féin, an timpeallacht agus an ionadaíocht. Is ionad turgnamhach é stiúidéo Andrew. Baineann sé úsáid as ábhair, prionsabail gheoiméadacha agus íomhánna ar mhaithe leis na smaointe iarstruchtúrtha a bhaineann le fearúlacht, an tírdhreach agus an dúil a athfhrámú. Is iomaí gradam atá buaite aige, ina measc; An Chomhairle Ealaíon Creative Development Award 2020-21, Scéim Sparánachta na n-Ealaíon, Ealaín na Gaeltachta 2020-21, Gradam Chultúr Éireann 2021, Gradam Chomhairle Ealaíon na hÉireann cumas déileáil le COVID 19.

Rugadh Nuala Ní Fhlathúin i Leitir Móir, Conamara, Co. na Gaillimhe. Tá BA sna mínealaíona agus MA sa dealbhóireacht bainte amach aici ó Ollscoil Washington, Seattle in 2011. Aithnítear í mar chleachtóir seanbhunaithe sna healaíona comhaimseartha i nGaeltacht Chonamara agus níos faide amach. Díríonn a cuid oibre go príomha ar ceisteanna i dtaobh ionaid, teanga, agus amharcléirithe. Tá a saothair maoinithe ag Comhairle Ealaíon na hÉireann, Ealaín na Gaeltachta agus Comhairle Chontae na Gaillimhe. Tá Nuala ag tabhairt faoi PhD praitic-bhunaithe le hIonad na n-Ealaíon Cruthaitheacha agus na Meán in Institiúid Teicneolaíochta na Gaillimhe-Maigh Eo.

Bhain Dan céim chéadonóracha sna mínealaíona (péinteáil) amach ón Scoil Ealaíne agus Deartha Luimnigh. Thosaigh sé amach ag péinteáil, ach diaidh ar ndiaidh thug sé an ghrianghrafadóireacht, déanamh físeáin, an scríbhneoireacht agus an dealbhóireacht isteach ina chuid oibre. Bhí tionchar nach beag ag an tsuim a bhí aige sa scríbhneoireacht, sa teangeolaíocht, agus sa stair ar a shaothar. Bhí forbairt spontáineach ag baint lena ealaíon, an-oscailte i dtaobh an phróisis, an chomhthéacs agus ábhar sóisialta agus cultúrtha. Bhí teachtaireacht fholaithe ag sní trína chuid oibre.

Is Árannach é Seán Ó Flaithearta agus tá stiúideo aige i gCill Éinne. Bhain sé céim san ealaín amach sa Choláiste Náisiúnta Ealaíne agus Deartha, Baile Átha Cliath agus chaith sé tréimhsí ag staidéar sa Bheilg agus i Stáit Aontaithe Mheiriceá. Tá a shaothar ar taispeáint in Éirinn agus thar lear. Ba é an Flaitheartach an t-ealaíontóir a rinne ionadaíocht ar Éirinn ag Féile Idircheilteach Lorient na Briotáine in 2009. Bhuaigh sé an comórtas dearcealaíne Ciall (An Gailearaí, Tír Chonaill) in 2011. Bhí sé ina dhearthóir ar an seó comórtha 1916 “Aisling?” (Ealaín na Gaeltachta); ar an dráma “Baoite” (An Taibhdhearc/Amharclann na Mainistreach); agus an seó “ORÓ” (Gaillimh 2020).

Is amharc-ealaíontóir í Ciara O’Flynn a bhfuil cónaí uirthi in iarthar Chiarraí. Bhog sí chuig an nGaeltacht tar éis di céim sna mínealaíona a bhaint amach ó Choláiste Ealaíne is Deartha Crawford, Corcaigh. Theastaigh uaithi lonnú sa Ghaeltacht chun díriú ar a cleachtadh mínealaíona agus an Ghaeilge a fhoghlaim. Tá sí mar chomhbhunaitheoir ar áis ealaíne sa Daingean d’arb ainm Stiúideo Shráid an Ghabhair.

Tugann Caoimhghín faoin líníocht agus an dealbhóireacht ar fud na cruinne - san Áis, san Eoraip agus sna Stáit Aontaithe. Bíonn sé ag cur faoi i dtíortha éagsúla ar fud an domhain, agus tá cáil idirnáisiúnta bainte amach aige mar thoradh ar a shár-obair.

Rugadh Karol i dTír Chonaill, Co. Dhún na nGall. Chaith sí tréimhse i Londain ag obair i réimse na hailtireachta. Tháinig sí go Leitir Ceanainn in 2015 mar chuid den dtionscadal Create-a-link, agus is as an dturas sin a d’eascair a dúil sna hamharc-ealaíona. Oibríonn sí le hola, uisce daite, colláis agus líníocht, de mhéid agus formáidí éagsúla. Tugann tírdhreach Thír Chonaill spreagadh di, agus tugann an péinteáil deis di a mothúcháin a aistriú ón dtírdhreach chuig an gcanbhás. Tá a cuid oibre le sonrú i dtaispeántais ghlaonna oscailte i dTír Chonaill, i Sligeach, i Maigh Eo agus san Acadamh Ibeirneach Ríoga i mBaile Átha Cliath.

Tá Ian ag cur faoi i nDún Lúiche, Co. Dhún na nGall le 40 bliain anuas. Rugadh i Londain é agus rinne sé staidéar sna mínealaíona ag Scoil Ealaíne Wimbledon agus an ailtireacht ag Ollscoil na Banríona, Béal Feirste. Is ealaíontóir ‘Plein Air’ é, agus baineann sé úsáid as olaí.. Díríonn a chuid oibre ar tírdhreach agus ar sráid-dreach an iarthuaiscirt. Léiríonn sé a shaothair i nDún na nGall, agus thar lear ó am go céile, na Stáit Aontaithe san áireamh.

Oibríonn Ian le léiriú, ceol, gearrscánnáin agus tugann sé faoin bpriontáil, an phéinteáil, an dealbhóireacht agus leabhair ealaíona. Léiríodh a shaothair in Éirinn, an Fhrainc, an Ghearmáin, an Fhionlainn, an Íoslainn, Poblacht na Seice, an Bhoisnia, an tSeoirsia agus an Airméin. Ghlac sé páirt in ócáidí ealaíona comhaimseartha sa tSeapáin, an Téaváin agus an Chóire, agus b’iomaí saothar ealaíne poiblí coimisiúnaithe ar thug sé fúthu i dTuaisceart agus i bPoblacht na hÉireann. Faoi láthair, tá sé ina chónaí i nDún na nGall agus i mBeirlín.